बाँके, ०७ भदौ ।
नेपालगञ्ज । जिल्ला वन कार्यालय (डिएफओ) बाँकेका सहायक वन अधिकृत ज्योति घिमिरेले वन कार्यालयहरुमा महिला कर्मचारीहरुको संख्या निकै नै कम भएको हुनाले प्रत्येक अभिभावकहरुले छोरीहरुलाई वन विज्ञानको विषय पढाउनकालागी सुझाव दिएकी छन् । मंगलबार नेपालगञ्जमा सञ्चारिका समूह बाँकेद्धारा आयोजित वन तथा वातावरण संरक्षण विषयमा महिला पत्रकारहरुसंगको अन्तरकृया तथा दर कार्यक्रममा अधिकृत घिमिरेले यस्तो सुझाव दिएकी हुन् । उनले महिलाहरुलाई कही कतै प्रमुख पद दिएईएता पनि निर्णायक भूमिका पुरुषहरुको नै रहने उल्लेख गरिन् ।
प्रमुख अथितिको रुपमा रहेकी सहायक वन अधिकृत घिमिरेले आफुु बाँकेमा आएको ४ वर्ष भएको जानकारी गराउँदै यो अवधीमा कुनैपनि महिला पत्रकारहरुसंग आफ्नो परिचय सम्म नभएको भन्दै गुनासो व्यक्त गरिन्,‘म सहायक वन अधिकृत भएर बाँकेमा आएको ४ वर्ष भई सक्यो तर यो अवधीमा मेरो भेट कुनैपनि महिला पत्रकारसंग हुन सकेन जुन निकै नै दुःख लाग्दो कुरा हो । यो कार्यक्रममा आएपछि मात्रै थाहा भयो यत्ति धेरै महिला पत्रकारहरु हुुनु हुँदो रहेछ ।’ उनले भनिन् । उनले यसै प्रसंगमा वन कार्यालयले गर्ने गतिबीधिहरुमा महिला पत्रकारहरुको सक्रियता र सहकार्य बढाउन महिला पत्रकारलाई आग्रह पनि गरिन् ।
सहायक वन अधिकृत घिमिरेले बाँकेमा वन कार्यालयले वन तथा वातावरण संरक्षणका विषयमा राम्रो काम गरेको बताउँदै १ लाख ११ हेक्टर वनको क्षेत्रफल रहेको बाँकेमा सबैभन्दा धेरै वनको भू–भाग प्रतिशतका हिसाबले बाँकेको राप्ती सोनारी गाउँपालिकामा रहेको र जीरो प्रतिशत वनको भू–भाग जानकी गाउँपालिकामा रहेको जानकारी दिईन् । साथै उनले जिल्ला वन कार्यालय बाँकेले निशुुल्क रुपमा बोटविरुवा उपलब्ध गराईरहेको बताउँदै उब्जनी हुन नसक्ने जमिनमा वृक्षरोपणकालागी विरुवा लगेर रोप्न पनि आग्रह गरिन् । कुनैपनि क्षेत्रमा महिलाहरु आर्थिक रुपमा सबल सक्षम हुनु पर्नेमा जोड दिंदै सहायक वन अधिकृत घिमिरेले वन तथा वातावरण संरक्षणकालागी सञ्चार माध्यम र सञ्चारकर्मीहरुको भूमिका पनि अत्यन्तै महत्वपुर्ण भएको बताईन् ।
कार्यक्रममा नेपाल पत्रकार महासंघ बाँकेका उपाध्यक्ष करुणा शाहले वन तथा वातावरणका विषयमा समाचार लेखनकालागी वन कार्यालयले महिला पत्रकारहरुलाई पनि समेटेर लैजान आग्रह गरेकी थिईन् । त्यसैगरी कार्यक्रममा सहभागी प्रेस चौतारी नेपाल बाँकेका उपाध्यक्ष रेजिना मल्लले जिल्ला वन कार्यालयसंग महिला पत्रकारहरुको परिचय र आगामी दिनहरुमा समन्वय गरेर काम गर्न सञ्चारिकाले सहयोगी भूमिका खेलेको भन्दै आयोजकलाई धन्यबाद दिंदै वन, वातावरण र वन्य जन्तुका विषयमा कलम चलाउन महिला पत्रकारहरुलाई आग्रह गरेकी थिईन् ।
त्यसैगरी कार्यक्रममा नेपाल प्रेस युनियनका बाँके शाखा अध्यक्ष अर्जुुन वलीले वन तथा वातावरणका विषयमा राम्रो समाचार लेखे बापत डब्ल्यू डब्ल्यू एफले सम्मान गर्ने कुुराको जानकारी गराउँदै महिला पत्रकारहरुलाई यस विषयमा सक्रियताका साथ कलम चलाउन सुझाव दिएका थिए । बाँके सञ्चारिका अध्यक्ष रुपनी जि.एमको अध्यक्षतामा सम्पन्न उक्त कार्यक्रममा उपस्थित अथितिहरुले सञ्चारिकाद्धारा आयोजित ‘वन तथा वातावरण संरक्षण विषयमा महिला पत्रकारहरुसंगको अन्तरकृया तथा दर कार्यक्रम’ केवल दर खानकालागी मात्र नभई वनका विषयमा महिला पत्रकारहरुलाई अझैं सक्रिय भएर समाचार संकलन गर्न ऊर्जा प्रदान गर्ने बताएका थिए । साथै उनीहरुले महिला पत्रकारहरुलाई तीजको शुभ–कामना पनि दिएका थिए ।
