काठमाडौँ, २३ भदौ ।
काठमाडौं महानगरपालिकाको मेयर बालेन्द्र शाहले नेपाली सेना र नेपाल प्रहरीलाई बहाल कर बुझाउन ताकेता गरेका छन् । नेपाल आर्मी, नेपाल प्रहरी र समाज कल्याण परिषद्लाई बहाल कर बुझाउन भन्दै मेयर शाहको निर्देशनमा महानगरको राजस्व विभागले पत्र लेखेको छ ।
कार्यालयहरूले आफ्नो क्षेत्रभित्र बहालमा लगाई बहाल आम्दानी गरेको देखिएकोले वडा कार्यालयमा बहाल कर बुझाउन पटक पटक ताकेता गरे पनि नबुझाएपछि ताकेता गरेको जनाएका छन् ।
बहाल आम्दानीको विवरणसहित पत्र प्राप्त भएको १० दिनभित्र सम्बन्धित वडा कार्यालयमा गएर नियमानुसार नबुझाए बहाल कर र जरिवाना दुबै बुझाउनु पर्ने महानगरले पतमा उल्लेख गरेको छ ।
तोकिएको मितिभित्र बहाल कर नबुझाए महानगरापलिकाको राजस्व ऐन, २०७५ बमोजिम कारबाही गरी बाँकी कर असूलउपर गर्न आवश्यक प्रक्रिया अघि बढाइने जनाएको हो ।
