काठमाडौ, १२ माघ ।
प्रेस काउन्सिल नेपालले आचारसंहिता उल्लंघन गर्ने ४५ वटा सञ्चारमाध्यमलाई कारबाही गरेको छ। काउन्सिलले पछिल्लो ६ महिनामा ४५ सञ्चारमाध्यमलाई कारबाही र एउटा अनलाइनलाई कालोसूचीमा राखेको छ।
काउन्सिलका सह-प्रवक्ता एवं सूचना अधिकारी उपप्रशासकीय अधिकृत रामशरण बोहराले आज विज्ञप्ति जारी गर्दै आचारसंहिताविपरीत सामग्री सम्प्रेषण गर्ने सञ्चारमाध्यमलाई कारबाही गरिएको बताएका हुन्। विज्ञप्तिमा आचारसंहिताविपरीत सामग्री सम्प्रेषण गर्ने २८ वटा सञ्चारमाध्यममध्ये २ वटालाई निर्देशन, ६ वटालाई ध्यानाकर्षण, ११ वटालाई सचेत, ४ वटालाई स्पष्टीकरण र ५ वटा वेबपोर्टललाई नेपालभित्र सम्प्रेषण हुन नसक्ने बनाउन पत्राचार भएको विज्ञप्तिमा जनाइएको छ।
यस्तै उजुरीका आधारमा दर्तारसूचीकरण नभएका १६ वटा वेब पोर्टललाई नेपालभित्र सम्प्रेषण हुन नसक्ने बनाउन नेपाल दूरसञ्चार प्राधिकरणमा पत्राचार गरिएको विज्ञप्तिमा उल्लेख छ।
यस्तै काउन्सिलले अदालतमा विचाराधीन मुद्दालाई प्रभाव पार्ने किसिमले सामग्री सम्प्रेषण गर्ने तनहुँबाट प्रकाशित प्रादेशिक खबर दैनिकसँग २४ घण्टे स्पष्टीकरण माग गरिएको जनाइएको छ।
काउन्सिलले पटकपटक आचारसंहिता प्रतिकूल सामग्री सम्प्रेषण गर्ने आइअफनेपाल डटकमलाई कालोसूचीमा राखी थप कारबाही अघि बढाएको छ।
